صرف 170 روپے میں اپنا مکان حاصل کریں، دنیا کے کن حصوں میں اتنے سستے مکان تمام سہولیات کے ساتھ موجود ہیں جانیں
اپنا گھر ایک ایسا خواب ہوتا ہے جو ہر انسان کی آنکھوں میں ہوتا ہے مگر زمینوں کی بڑھتی ہوئی قیمتوں نے اس خواب کو مشکل ترین بنا دیا ہے۔ ایک عام انسان دنیا کے کسی بھی حصے میں رہتا ہو لیکن ساری عمر بچت کر کے بھی ایک عام سے فلیٹ کا مالک نہیں بن پاتا ہے ۔ کرائے کے گھر میں رہتے ہوئے ہر مہینے کرایہ دینے کے بعد اتنی بچت نہیں ہوتی ہے کہ وہ گھر کے مالک بن سکیں-
دنیا کے کچھ ممالک جہاں سستے مکان ملتے ہیں
اگرچہ زمین کی قیمتیں دنیا بھر میں آسمان سے باتیں کر رہی ہیں مگر دنیا کے کچھ ممالک اپنے کچھ علاقوں میں آبادی میں اضافے کے لیے لوگوں کو ایسی آفرز دیتے ہیں جس کے بعد وہ لوگ وہاں آباد ہونے کے لیے تیار ہو جاتے ہیں اور ان آفرز میں سستے ترین مکانات کی آفر بھی شامل ہیں- ایسے کچھ ممالک کے بارے میں ہم آپ کو آج بتائيں گے-
سمبوکا، اٹلی
اٹلی کی حکومت نے رئيل اسٹیٹ والوں کے لیے اس وقت دھماکہ کر دیا جب انہوں نے مکمل گھر کو صرف ایک ڈالر میں فروخت کے لیے پیش کر دیا- یہ تمام مکانات ان گاؤں دیہاتوں میں موجود تھے یا پھر ان علاقوں میں تھے جہاں آبادی بہت کم تھی- اٹلی کے علاقے سمبوکا کا شمار ان علاقوں میں ہوتا ہے جہاں پر آج بھی صرف ایک ڈالر میں مکانات موجود ہیں لیکن اس کے ساتھ ساتھ یہ شرط بھی عائد کی گئی ہے کہ صرف تین سالوں کے عرصے میں مکان کے مالک نے نہ صرف اس کو آباد کرنا ہوگا بلکہ اس کی تزئين اور آرائش کر کے اس کو رہائش کے قابل بنانا ہوگا-
روبیکس فرانس
روبیکس فرانس کا یہ شہر بیلجیم کے قریب آباد ہے جو معاشی حوالے سے بھی تیزی سے ابھرتا ہوا شہر ہے جہاں پر ترقیاتی کام تیزی سے جاری ہیں اس شہر میں لوگوں کی آبادی کو بڑھانے کے لیے یہاں پر صرف ایک ڈالر میں مکانات فراہم کیے جا رہے ہیں- ان مکانات کو حاصل کرنے کے بعد یہاں کے مالکان کو پانچ سال کے اندر ان مکانات پر اپنا پیسہ اور وقت خرچ کر کے نہ صرف آباد کروانا ہوگا بلکہ ان کی تزئین و آرائش بھی کرنی ہوگی-
ٹوکیو جاپان
اگرچہ جاپان میں آبادی میں تیزی سے اضافہ ہوا ہے مگر اس کے باوجود اس ملک میں اب بھی بہت سارے ایسے مکانات موجود ہیں جو بے آباد ہیں اور ان کو آباد کرنے کے لیے کوئی بھی تیار نہیں ہے- ایسے مکانات ٹوکیو میں موجود ہیں اور ان مکانات کے بے آباد ہونے کی وجہ وہاں کے لوگوں کی توہم پرستی ہے- یہ وہ مکانات ہیں جہاں پر کسی نہ کسی کے جرائم وقوع پزير ہوئے ہوں یا پھر ان کو آسیب زدہ قرار دیا جاتا ہے ایسے مکانات کو آباد کرنے کے لیے جاپان کی حکومت مفت میں بھی دینے کو تیار ہے- ایسے مکانات کی فراہمی کے لیے جاپان میں ایک آن لائن ویب سائٹ بھی بنائی گئی ہے-
اوکیو ٹاما جاپان
اگر آپ فطرت کے قریب رہنے کے خواہشمند ہیں تو اوکیوٹاما کے مکانات آپ کے لیے ایک بہترین آپشن ثابت ہو سکتے ہیں- لیکن جاپان کے لوگ اس علاقے کو خوبصورت قرار دینے کے ساتھ ساتھ آسیب زدہ بھی قرار دیتے ہیں اس وجہ سے یہاں آبادی نہ ہونے کے برابر ہے- اس علاقے کو آباد کرنے کے لیے جاپان کی حکومت نے یہاں پر 43 سال یا اس سے کم عمر افراد کے لیے مفت گھر فراہم کیے ہیں- لیکن یہاں رہائش اختیار کرنے والے افراد اس گھر کی ملکیت اسی وقت تک حاصل کر سکتا ہے جب کہ وہ اس گھر میں 22 سال تک رہائش اختیار کرے-
لیور پول برطانیہ
برطانیہ کے شہر لیور پول میں تقریباً دو لاکھ ایسے مکانات موجود ہیں جو کہ کسی کی رہائش کے لیے استعمال نہیں ہوتے ہیں۔ مختلف وجوہ پر لوگوں نے ان گھروں میں رہائش ترک کر دی اس وجہ سے برطانیہ کی حکومت نے ان گھروں کو صرف ایک ڈالر میں فروخت کے لیے پیش کر دیا ہے- تاہم ایسے گھروں کی ملکیت حاصل کرنے کے لیے ضروری ہے کہ آپ اس علاقے کے ہی رہنے والے ہوں اور اس گھر کو حاصل کرنے کے بعد پانچ سال کے اندر اس علاقے کے لیول کے مطابق اسکی تزئين و آرائش کر سکیں-
کینڈیلا اٹلی
کینڈیلا اٹلی کے حکام اس حوالے سے منفرد مقام رکھتے ہیں کہ وہ صرف ایک ڈالر کا مکان ہی پیش نہیں کرتے ہیں بلکہ اس مکان کو بسانے کے لیے دو ہزار ڈالر بھی ساتھ میں دیتے ہیں اور ایسا صرف اس لیے کیا جاتا ہے کہ لوگ ان کے ان بے آباد علاقوں کو آباد کر سکیں- ہمارے ملک میں بھی غریب لوگوں کو اس طریقے سے گھر کا مالک بنایا جا سکتا ہے لیکن اس کے لیے سب سے پہلے حکومت کو ان تمام علاقوں کے اعداد و شمار جمع کرنے ہوں گے جہاں آبادی کی جا سکتی ہے- اس کے بعد اس طریقے سے پورے ملک میں آبادی کو یکساں طور پر تقسیم کرنے کی کوشش کی جا سکتی ہے-
